撰文：何七
圖片提供：文偉電單車中心

小孩子才會做選擇！Triumph Street Triple 765，一個中量級嘅街霸型號，不論性能、造型都絕對能滿足一眾車迷。不過，廠方深知車迷面對再好嘅設計都會想更上一層樓，於是就誕生咗Street Triple 765 RX同埋Street Triple Moto2 Edition。一款只限今年發售，另一款則全球限量1,000輛。兩款車各有特色，若果唔係戶口餘額帶嚟限制，我都好想講句：我全都要！

RX之名
能配上RX名字嘅，都係Triumph家族入面專注於運動化騎乘嘅型號。第一輛RX版喺2015年登場，當時嘅Street Triple RX已經畀人一種進取及敏銳嘅感覺，係基本版以外嘅升級首選。佢嗰種極具動感嘅個性，加上獨特嘅線條造型，令RX旋即受到車迷追捧，同時亦奠定咗RX作為「賽道就緒」嘅標誌。

來到2026年，繼Speed Triple 1200 RX之後，RX之名再一次回到Street Triple身上。最新版嘅RX可說係Street Triple嘅賽道專注版，將比賽技術、流線造型以及高階部件融匯於一身，展現出Triumph不論喺日常街道定係賽道上，皆已臻至成熟嘅造車工藝。

Triumph與Moto2
自2019年起，Triumph成為咗Moto2嘅單一品牌引擎供應商，一直為Moto2車隊提供專為比賽調校嘅三缸引擎，喺呢項嚴苛嘅世界最高殿堂賽事中，展現咗極佳嘅性能表現。喺呢段期間，Triumph亦達成咗令人驚訝嘅里程碑，例如極速達到300km/h、76項賽事圈速紀錄、89項圈速歷史紀錄，以及喺賽事環境中跑咗超過170萬公里！

Triumph嘅765c.c.引擎喺Moto2賽事中被推向極致，喺如此極端嘅環境下證實咗佢嘅耐用性。呢啲寶貴嘅賽道數據，讓Triumph嘅工程師可以進一步將引擎推向頂峰，將賽道嘅語言完美套用喺Street Triple嘅開發之中。

三缸頂級動力
Street Triple 765 RX同Moto2版共用咗與RS版相同嘅心臟，一台喺12,000rpm能爆發出130ps最大馬力，以及喺9,500rpm提供8.16kg-m最大扭力嘅機器。工程師嘅目標係將原本已經表現出色嘅RS，進一步調校成更有賽道個性嘅版本。設計重點在於以輕巧嘅車架，配以全調校式Ohlins NIX30倒立前叉，仲有全調校式嘅Ohlins STX40尾避震，為每一個彎角提供極致嘅路面回饋與操控。呢套賽道級配置確保騎仕能有穩定且反應敏銳嘅體驗，不論喺賽道攻向彎心，定係喺蜿蜒山路上都能夠得心應手。

除咗旗艦級懸掛，車身盡是受賽事啟發嘅零部件，專門為使操控更精良及為騎仕帶來更大信心而設。分離式把手帶嚟更進取、更前傾嘅坐姿，即係更適合賽道駕駛嘅姿勢。另一方面，車頭一雙Brembo Stylema四活塞卡鉗配以Brembo MCS可調式手泵，手泵提供咗拉桿距離及壓力比嘅調校，確保制動精確且全面受控。輪下配上Pirelli Diablo Supercorsa SP V3輪胎，抓地力及牽引力絕對無庸置疑。全車濕重只有188kg，令Street Triple操控更為靈活。

兩個新型號都配上5吋TFT顯示屏幕，以及高階按鍵配置。Moto2版嘅啟動畫面完美展現佢嘅賽車血統，上眼鏡更可以搵到1,000輛限量版嘅獨立編號。電子系統方面，例如有ABS Track模式、最佳化彎道ABS以及循跡控制系統，全部都係為提升穩定性而設，讓騎仕喺壓彎時有更好表現。加上Triumph Shift Assist無縫上下轉檔無需拉離合器，騎仕嘅發揮自然更得心應手。

車身風格
Street Triple RX採用咗進取嘅設計風格，令車身處處展現出速度感。啞面鋁銀底色，配上極為搶眼嘅魔鬼紅車尾副架及輪框，將源自賽車嘅設計靈感推向極致。除咗油缸兩側，座鞍上都可以搵到RX字樣。另外上眼鏡同尾鼓亦有RX標誌，就算遠距離都絕對唔會認錯。

Moto2版則將賽車基因推向另一層次，用上礦物灰同水晶白作為主色，再以Triumph Performance Yellow(黃色)於車尾副架及輪框色條作點綴，帶嚟截然不同嘅運動化風格。車身多處印有Moto2品牌標誌，例如油缸、座鞍及尾喉，TFT儀錶嘅起始畫面亦有專屬動畫，進一步確立佢同Moto2嘅連繫。車身兩側嘅飾片、肚兜及頭燈上嘅飾片全部用上碳纖維製作，加上上眼鏡嘅限量獨立編號，令Moto2版成為Street Triple家族中最獨特、最尊貴嘅一員。

總結：車霸進化，兩款皆是終極之選！
不管是專為賽道而生、限量1,000輛且滿載碳纖維部件嘅Moto2 Edition，還是將競技基因與道路實用性完美結合嘅Street Triple 765 RX，Triumph這次都交出咗一份令車迷熱血沸騰嘅答卷。兩款新車同樣繼承咗Moto2淬鍊出嘅強悍三缸心臟與旗艦級懸掛配備，更展現出截然不同嘅英倫狂野美學。正如開篇所講，面對呢兩輛無可挑剔嘅中量級街霸，如果唔係戶口餘額限制，又有邊個車迷能抗拒「我全都要」嘅誘惑呢？

2026 Triumph Street Triple 765 RX(Moto2)規格表
全長：2,051mm
全闊：765mm
全高：1,051mm(不連睹後鏡)
軸距：1,397mm
座位高度：839mm
最低離地距：-mm
濕重：188kg
油箱容量：15L
引擎型式：水冷四衝程直列三汽缸DOHC 12閥門
缸徑x衝程：78.0mm x 53.4mm
容積：765c.c.
壓縮比：13.25:1
最大馬力：130ps/12,000rpm
最大扭力︰8.16kg-m/9,500rpm
供油系統︰電子燃油噴注
點火：電子
起動：電動
離合器/波箱：濕式多片滑動及輔助式，6前速
前傾角：23度
拖曳距：95.3mm
耗油量︰5.2L/100km
碳排放︰119g/km
車架︰鋁合金雙翼樑車架，兩件式高壓壓鑄車尾副架
前懸掛系統：Ohlins NIX30 41mm倒立前叉，附壓縮、回彈及預載調校，行程115mm
後懸掛系統︰Ohlins STX40帶樽單筒彈簧附壓縮、回彈及預載調校，行程131.2mm
前制動系統：310mm雙浮動鑽孔碟配Brembo Stylema單體放射式四活式卡鉗，Cornering ABS
後制動系統︰220mm單鑽孔碟，配Brembo單活塞卡鉗，Cornering ABS
前輪框：3.50″ x 17″鋁合金五柱式輪框
後輪框：5.50″ x 17″鋁合金五柱式輪框
前輪胎︰120/70 ZR 17
後輪胎︰180/55 ZR 17